اگو شي بديت الاحظه
هسة احنا گعراقيين شيعة و سنة و مسيح من البصرة للموصل
صرت اشوف ان احنا صرنا منبوذين
يعني ما نگدر نختلط ويا المچتمعات العربية الثانية
لان محد متقبلنا
ليش محد متقبلنا
1- بسبب اغلبية العراقيين يتبعون المذهب الشيعي (و الذاهب و الاديان الثانية على راسي گلها)
2-سوء السمعة
3-بسبب صدام حسين (البعض يگرهه و البعض يحبه)
4-بسبب نظام الدولة الحالي
و راح اشرح الاسباب
اولاً بسبب المذاهب: العرب اغلبيتهم يتبعون فگر يميني يعني يگرهون شگو واحد يخالفهم سواء بالراي او بالمذهب او الدين او اي شي فهم ماراح يتقبلون العراقي لانهم راح يعتقدون انه شيعي ولو ان اگو شيعة زينين و مالهم بالمشاگل و لا الهم بالطائفية و لا باي شي و حسب ما شفت ورا ما تعرفت على سنة من مصر و فلسطين (من موقع اجابة) حسب ما يگولون انهم من صغرهم تعلموا على ان الشيعة ناس مو زينين و الخ و هم اگو بالمجتمعات الشيعية المتعصبة يعلمون الصغار ان السنة مو زينين و الخ و هذا راح يسوي حقد طائفي و الحقد هذا راح يطيح براس الزينين و الي مالهم بالطائفية و بالمذاهب و عايشين بسلام
ثانياً سوء السمعة: بعض العراقيين يحبون المشاگل سواءاً ويا الدول الثانية او بيناتهم (ويا العراقيين نفسهم) يعني يشوفون خليچي يسبونه يشوفون ايراني يسبونه يشوفون امريگي يسبونه و اسوأ شي احياناً البعض منهم عراقي و يشوف عراقي سني يسبه او عراقي و يشوف عراقي شيعي او يشوف كردي و يسبه مع ان اگو اكراد زينين و ينحطون ع الراس و هذا الي خله ترامب يحظرنا لانه شافنا متخلفين بس نعارگ و هذا الي شوه سمعة العراقيين
ثالثاً صدام حسين: اولاً صدام حسين هذا الرئيس العراقي السابق استلم الحگم عام 1979 و چان نظام حگمه شيوعي اشتراگي يساري يعني رحيم ويا البعض و قاسي ويا البعض و هذا خله بعض العراقيين يگرهونه لانه چان قاسي وياهم و بعض العراقيين يحبونه لانه چان رحيم وياهم بس بالنسبة للعرب اگو بيهم يحبونه لانهم چانوا يشوفونه گـ بطل قومي و البعض ما يعرف شي عنه و يحبه بس لانه حارب ايران و البعض من العرب يگرهونه لانهم چانوا يعرفون انه قاسي ويا البعض بس هذا مو سبب مقنع لان نظام الحگم اشتراگي يساري و البعض يگرهه لانه احتل الگويت و اراضي من السعودية و قصف السعودية و الخ بس المشگلة ان العرب ما يتقبلون الا اليحب صدام و بس
رابعاً نظام العراق الحالي: تقريباً اغلبيه العرب مايريدون النظام الحالي و حتى العراقيين ما يريدونه بس الاسباب مختلفة العرب يگرهونه لانه الاغلبيه الي بيه من المذهب الشيعي و لانه اچى ورا الاحتلال الامريگي و لانهم چانوا باسم (المعارضة العراقية) اما العراقيين يريدون الخير لبلدهم و بس حتى لو اليهود حگموه و هذا الي شفته بالعراقيين يعني صدگ النظام اغلبيته شيعة بس الشيعة العراقيين نفسهم يطلعون بمظاهرات ضده علماً ان نظام العراق الحالي دمقراطي بس بيه گومة فساد يعني الشيعة و السنة گلهم فساد بمجلس النواب بس العرب يشوفون العراقيين گلهم يريدون النظام مع ان الواقع العگس
باختصار
العرب يريدون العراقي يگون متفق وياهم بارائهم و بگلشي و اغلبيه العرب ما شافوا العراق بس يسمعون عنه بچهات گلها چذب
و گونگ انت گعراقي و تروح تسب بالعالم و تلطلط بطائفية هذا انت گاعد تضر العراق و تشوه سمعتنا و تخليها بالطين بعد فعلى اي گلمة تگولها فگر مليون مرة گبل ما تنطقها
و العراقي هسة و حتى يگدر يختلط ويا المچتمعات العربية مثل بقية العرب لازم تگون عنده هاي المواصفات
انه يگون من اهل السنة و يحب صدام (شيعي و يحب صدام مايصير)
ما يگون من محافظات الجنوب
لازم يحب اليحبونه
ورا وگت طويل من التفگير لگيت ان الحل
نصير مثل گوبا يعني ننعزل عن العالم گله لان محد يربد اغلبيتنا فاحنا مانريد احد منهم
يعني نظام العراق يصير شيوعي مارگسي و ما يفرق بين احد و الحاگم يتخذ نظام العراق و بس و طز بالعالم
ملاحظة اخيرة: اگو مچتمعات عربية ترحب بالعراقيين من گل مگوناتهم و من گل طوائفهم و اديانهم مثل لبنان و الامارات و سلطنة عمان
تعبت و انا اگتب گل هذا فرچاءً لخاطر ربگم المو عراقي يقرا بس لا يچاوب و لو يريد يحط الحطب ع النار يعني لا تسويها طائفية او تحچي بالدين
مع احترامي لگل العرب و لگل الاديان و الطوائف ????